Numri i ulët i studentëve po ndikon në “shkrirjen” e universiteteve apo fakulteteve në Shqipëri.
Një ndër ta është dhe universiteti “Fan S.Noli” në Korçë. Senati i universitetit kërkoi bashkimin me Universitetin e Tiranës, por ky vendim i senatit të Universitetit të Korçës është pritur me kritika.
Ministria e Arsimit mori një vendim për t’i dhënë çdo studenti ekselent ose që zgjedh të studiojë në një nga programet prioritare mundësinë e përfitimit të një burse mujore, e cila është e barazvlefshme me pagën minimale, 40 000 lekë. Përveç shpërblimit mujor, kjo bursë i heq studentëve përfitues edhe detyrimin për të paguar tarifën vjetore.
Qeveria ndërmori këtë si një hap nxitës për të rritur numrin e studentëve në degët prioritare. Janë gjithsej 35 programe studimi të cilat konsiderohen prioritet kombëtar dhe që bëjnë studentët e kategorive të mësipërme përfitues të kësaj burse.
Sot, deputeti i qarkut, Niko Peleshi, ka dalë me një njoftim se numri i maturantëve nuk ka rënë, dhe se këtë vit ka më shumë maturantë se në vitin 2020.
Ai kërkon reformim, ndërkombëtarizim dhe profilizim më të mirë të universitetit për të rritur cilësinë e universitetit.
Ja çfarë ka shkruar ai;
JAVË E RËNDËSISHME PËR UNIVERSITETIN “FAN S. NOLI”
Diskutimi i hapur në universitet i bën mirë të ardhmes. Në kohën e sotme të avancimit galopant teknologjik, tregut të punës të trazuar nga pandemia, sigurisë dhe stabilitetit të sfiduar, lëvizjes gjithnjë dhe më të lirë të njerëzve, shqetësimi i universitetit tonë dhe i gjithë universiteteve në Shqipëri dhe më gjerë është tërësisht i justifikuar.
Por unë jam shpresëplotë se bashkimi i forcave do të sjellë lajme të mira. Korça si rajon ka potenciale të jashtëzakonshme për një perspektivë zhvillimi të qëndrueshëm.
Lajmi i parë inkurajues:
NUMRI I MATURANTEVE NË 5 VITET E FUNDIT NUK KA RËNË
Ka vetëm luhatje +/- 3%-4%. Aspak shqetësuese, përkundrazi një tregues qëndrueshmerie.
Janë të gjitha shanset që Universiteti “Fan S. Noli”, të rritet në numër dhe cilësi nga viti në vit përmes REFORMIMIT, NDËRKOMBËTARIZIMIT dhe PROFILIZIMIT më të mirë.
