Biznesmeni Luan Muça ka dhënë dëshminë e tij lidhur me përplasjen me armë të ndodhur në Vlorë, ku akuzon shtetasin Vasil Bedinaj se e ka pritur me persona të armatosur gjatë një takimi për sqarimin e pronësisë së një sipërfaqeje toke në Palasë.
Përplasja për tokën 97 mijë metra katrorë në Palasë
Sipas pretendimit të tij, konflikti ka nisur për shkak të mbivendosjes së lejeve të ndërtimit mbi një sipërfaqe prej 97.000 m² tokë të blerë nga ai që nga viti 2019. Muça sqaron se pasi ka marrë statusin e investitorit strategjik më 15.07.2021 për një projekt me studio arkitekturore ndërkombëtare dhe ka nisur punimet për një hotel me 5 yje mbi 26.000 m², ka vërejtur se mbi të njëjtën tokë ishte dhënë një leje tjetër ndërtimi.
Pas interesimit pranë Agjencisë Zyrtare të Zhvillimit të Territorit (AZHT), biznesmeni deklaron se është kontaktuar nga i dyshuari Vasil Bedinaj për t’u takuar në një hotel në Orikum. Sipas dëshmisë së Muçës, gjatë takimit situata është tensionuar dhe ai pretendon se ndaj tij dhe shoqëruesve të tij është qëlluar me armë zjarri nga persona të armatosur në momentin që po largoheshin.
Hetimet e policisë dhe pretendimet për gjobëvënie
Biznesmeni Luan Muça ka bërë me dije se është mbajtur i ndaluar nga Policia e Shtetit për 72 orë me dyshimin për gjobëvënie ndaj shtetasit Bedinaj, akuzë të cilën ai e cilëson të trilluar. Ai i ka bërë thirrje organit të policisë për zbardhjen e plotë të ngjarjes dhe identifikimin e personave që kanë qëlluar me armë.
