Përpara fillimit të takimit, kanë qenë korçarët që për herë të parë janë grumbulluar në pankinën e tyre dhe janë betuar së bashku me Gjokën për fitore.
- Gjoka dhe Mezani kanë qenë të fokusuar te loja e dy ekipeve, duke dhënë herë pas here këshillat për të vetët në pjesën e vendosjes dhe pasimeve në fushë.
- Golat kanë sjellë reagime të ndryshme dhe pështjellime në dy kryepankinat. Goli i Bylisit ka çuar peshë Mezanin, që ka kërkuar nga të tijët administrim, teksa, ende pa mbaruar festa e Bylisit, ka qenë radha e Gjokës për të festuar barazimin e shpejtë. E gjithë pankina është çuar në festë, me trajnerin që u kërkonte lojtarëve të bënin maksimumin për të fituar takimin.
- Momente debati dhe acarimesh ka pasur edhe në tribunën e stadiumit, pasi goli i parë i shënuar nga Bylis ka sjellë edhe reagimin e Ruçit karshi tifozëve duke i provokuar. Këta të fundit nuk kanë kursyer ofendimet dhe hedhjen e sendeve drejt lojtarit ballshiot për provokimin e bërë.
- Goli i Bylisit, veç ngarkesës psikologjike, është shoqëruar edhe me një moment për t’u veçuar në këtë takim. Lojtarët dolën të gjithë nga fusha dhe Sabo vë re këtë fakt, duke udhëzuar Jurin të nisë shpejt topin. Korçarët shënojnë, por goli nuk vlen, pasi Jorgji nuk jep vendimin se loja mund të rifillonte. Pikërisht ky rast është bërë shkas e një debati mes Gjançit dhe Mikailidis, që për pak sa nuk shkoi në kontakt fizik.
- Pas golit të pësuar, Gjoka nuk është më në gjendjen e duhur psikologjike për të drejtuar ekipin dhe ulet në pankinë. Vendin e tij e zë Liçi, të cilin nuk e mban vendi. Ish-kapiteni duket se e vuan më shumë faktin që ky rezultat do të zbresë ekipin nga kategoria dhe kjo bën që të jetë tejet i nervozuar edhe në pistë. Kulmi arrin me kapitenin e Bylisit, Abazaj, i cili, në momentin e zëvendësimit, po vononte lojën. Kaq ka mjaftuar që Liçi dhe Abazaj të shkëmbejnë fjalë dhe ofendime në distancë.
- Tre tifozë janë shoqëruar në fund të takimit nga uniformat blu pasi kanë hedhur sende në fushë.
