Emisioni Fiks Fare solli rastin e shkollës së mesme të bashkuar në Podgorie të Maliqit, drejtori i së cilës bën ekskursion pa miratim nga Zyra Vendore Arsimore.
Gazetarët e Fiksit shoqëruan në Dajt gjatë ekskursionit rreth 120 fëmijët të cilët treguan se kanë udhëtuar pa lejen e Drejtorisë Arsimore. Madje njëherë ishin lajmëruar se do anulohej, por pastaj u lejuan sërish.
Shoferët që sollën fëmijët gjatë bisedës me bashkëpunëtorët e Fiksit treguan se kishin marrë 1.400 lekë të reja për udhëtimin vajtje-ardhje, ndërkohë që fëmijëve drejtori u ka marrë 2.000 lekë të reja.
Sipas vendimeve të Ministrisë së Arsimit këto ekskursione nuk lejohen pa miratimin e Zyrës Arsimore e aq më tepër marrja e lekëve sipas marrëveshjeve që bën drejtori i institucionit arsimor me shoqërinë e transportit.
