Zonat rurale vijonë të jenë në mëshirë të fatit duke mos ofruar edhe mundësitë më të vogla të shërbimit.
Në adresë të kolibri.al kanë mbërritur disa ankesa nga familje që jetojnë mbi shkollën në fshatin Mëmlisht të Pogradecit në lidhje me rrugën që lidh qendrën me këto banesa.
Sa herë bie shi rruga ngjason me një përrua të madh ku kalojnë vetëm ujrat e shiut. Gjendja e saj është mjaft e vështirë në periudhë pa shira, ndërsa kur vjen vjeshta dhe dimri është e pamundur të lëvizet në këmbë e jo më me mjete.
Banorët shprehen se vazhdimisht janë ankuar pranë njësisë duke kërkuar investim për rrugën por deri më sot kanë marrë vetëm premtime dhe shpresë, sepse rruga vijon të degradohet edhe më shumë.
Në rast se do kërkohet ndihmë mjekësore apo emergjencë civile e sigurtë që as ambulanca e as zjarrfikësja nuk ngjitet në këtë zonë.
Përveç kësaj banorët përballen edhe me mungesë të kanalizimeve dhe i derdhin ujrat e zeza ku të mundin të cilat më pas përfundojnë në liqen.
Kolibri.al u intersua pranë bashkisë dhe kjo e fundit konfirmoi se situata është problematike duke thënë se rruga është pjesë e projektit për asfaltimin e rrugëve të Mëmlishtit, ndërsa sa i përket ujrave të zeza janë duke realizuar projektin për sistemimin e tyre.
Deri në nisje të këtyre projekteve banorëve nuk ju mbeter gjë tjetër veçse të bëjnë “gajret” dhe sigurisht të mos sëmuren për të pasur nevoja emergjente.
