Prej disa javësh në Pogradec propozimi i UK sh.a për rritjen e tarifsë së ujit kishte ngjallur diskutime të vazhdueshme.
Por tashmë pas përfundimit të konsultimeve publike, këtë të enjte në senacën kur u miratua Buxheti 2024, u dha edhe pëlqimi i këshillit bashkiak për rritjen e tarifës së ujit në qytet dhe fshatra me 5 lek.
Konkretisht në qytet tarifa është 60 lek për metër kub dhe propozohet të shkojë në 65 lek dhe në fshatra është 30 lek për metër kub dhe propozohet të shkojë 35 lek.
Tashmë me marrjen e pëlqimit nga shumica e këshilltarëve bashkiakë, ky propozim i dërgohet ERRU i cili është autoriteti që miraton tarifat për ujësjellsat dhe do të jetë ky autoritet që do të vendosë përfundimisht rritjen ose jo të tarifës.
Sipas Uk sha Pogradec shkak për këtë rritje janë bërë rritja e pagave dhe shpenzimeve të këtij institucioni me indeksimin e pagave.
Por ajo që dihet tashmë qartazi se me rritjen e pagës, popullata e Pogradecit do të përballet edhe me rritjen e tarifës për ujin e pijshëm, çka nënkupton se duhet të tregohen nikoqirë që të mos e harxhojnë pa kriter.
