Policia e Pogradecit ka bërë një zhvillim të rëndësishëm në hetimet për ngjarjen e rëndë ku humbi jetën 52-vjeçarja Kozeta Teço. Burime nga grupi hetimor bëjnë me dije se pranë një kazani mbetjesh urbane, janë gjetur një palë pantallona, për të cilat dyshohet se i përkasin autorit të dyshuar të ngjarjes.
Zbulimi është bërë pas analizës së pamjeve filmike nga një biznes privat, i pozicionuar përballë vendit ku ndodhet kazani. Sipas pamjeve, një person është parë duke hedhur një send brenda mbeturinave, çka ka shtyrë policinë të kontrollojë zonën dhe të gjejë provat e mundshme.
Nga hetimet paraprake, është përjashtuar pista e grabitjes, si dhe kjo ngjarje nuk lidhet me konflikte pronësie. Dyshimet janë për një motiv tjetër, ende të paqartë, ndërsa hetimet po vijojnë me intensitet nga grupi i posaçëm hetimor.
Policia po kryen ekspertiza të mëtejshme mbi rrobat e gjetura, ndërsa po kërkon edhe prova të tjera materiale që mund të çojnë në identifikimin dhe kapjen e autorit.
