Kjo që shihni në foto është godina e ish spitalit të Pogradecit në periudhën e komunizmit. Për shumë vite me radhë ajo i shërbeu komunitetit për të marrë shërbim shëndetësor, ndërsa sot i shërben anti reklamës së një qyteti i cili ekonominë e ka të bazuar në turizëm.
Nuk ka njeri që ka udhëtuar drejt Pogradecit dhe të mos i ketë rënë në sy kjo godinë kur futesh në qytet. Ajo lëngon e tëra por nga ana tjetër mbetet një rrezik potencial për banorët.
Për shumë kohë ishte kthyer në një vendgrumbullimi mbetjesh urbane, në fakt vijon të ketë të tilla në brendësi, për një pjesë tjetër ka shërbyer si banjë publike ashtu siç luan edhe rolin e një strehëze për narkomanët e qytetit.
Akoma më e problematike bëhet situata pasi territori rreth saj është i parrethuar, nuk ka asnjë pengesë e cila do të ndalonte hyrjen e fëmijëve apo kujtdo tjetër të cilët rrezikojnë jetën nëse shkojnë aty nga rënia e ndonjë trau të çatisë.
Kolibri.al pas interesimit mësoi se ka një veprim konkret që pritet ti japë fund kësaj situate, pronarët kanë nisur procedurat për një leje ndërtimi e cila do shembë njëherë e përgjithmonë këtë shëmtirë për të rindërtuar njësi shërbimi, ndërkohë që edhe hapsirat përreth do të kurohen me shije siç i ka hije hyrjes së një qyteti.
Por deri sa kjo të ndodhë, kjo godinë e shëmtuar do të jetë “hudhra” që qyteti liqenor të mos bjerë n’sy.
