Prej muajit maj 2023 harta e re gjyqësore shënoi mbylljen e Gjykatës së Shkallës së parë në Pogradec. Një situatë e tillë u shoqërua me efekte negative zinxhir, rritje kostosh për qytetarët dhe mbyllje të zyrave ligjore nga avokatët.
Por teksa ky hall nisi të harrohet pak nga pak, tashmë qendrës së qytetit i është shtuar një tjetër godinë e pajetë, ish gjykata. Një investim disa miliona euro që u bë për llogari të Ministrisë së Drejtësisë e që sot doli jashtë funksioni.
Miliona euro të ikur dëm, e nga ana tjetër një godinë bosh që nuk i shërben më as dreqit. Pyetja që ngrihet është, përse i duhet tashmë ky objekt Ministrisë së Drejtësisë?
Përse kjo e fundit nuk e vendos atë në dispozicion të institucioneve lokale për zyra shërbimi apo aktivitete të tjera. Godina ka plot zyra si dhe salla mjaftueshëm për organizime aktivitetesh, konferencash apo gjithçkaje tjetër me karakter publik.
Kolibri.al ka mësuar se është bërë një tentativë nga Bashkia e Pogradecit për përdorimin e këtyre ambienteve por kërkesa është refuzuar kategorikisht nga Ministria, arsyetim jo, vizion për të ardhme jo. Pra duket se nuk ka diçka konkrete e projektuar në të ardhmen nga Ministria si për godinën e Prokurorisë ashtu edhe të Gjykatës.
Sigurisht që kemi të bëjmë me asete ministrie, por janë objekte me karakter publik dhe jo privat, e për aq kohë sa Ministria nuk lëshon pe për përdorimin e tyre, merimangat do të bëjnë të vetën, me shpresë se në të ardhmen nuk do kthehen në dhoma rezidenciale për magjistratët e “varfër” të gjykatave dhe prokurorive.
