Muaji janar ka sjellë shtim të rasteve te personave të prekur nga gripi dhe virozat stinore në Pogradec. Edhe pse kjo periudhë shënon pikun e infektimeve, nuk ka patur raste me komplikacione.
Sipas drejtores së Njësisë Vendore të Kujdesit Shëndetësor Pogradec Elona Katiraj, për këtë ka ndikuar aplikimi i vaksinës kundër gripit. Fushata e vaksinimit ka bërë që të mos ketë situatë të ngarkuar si në qendrat shëndetësore ashtu edhe në spitalin bashkiak.
Sipas Katiraj shumica e banorëve kanë shprehur interes për aplikimin e vaksinës antigrip. Deri në këto momente janë aplikuar rreth 90% e vaksinave. Sipas saj në qendrat shëndetësore janë shpërndarë rreth 6000 doza, prej të cilave 5200 tashmë janë aplikuar në popullatë.
