Pak ditë më parë pronari i një prej kompanive më të mëdha të ndërtimit në vend Arlis Construction ka ndarë në rrjetet sociale projektin e investimit që do të realizohet pranë liqenit të Pogradecit tek zona e ish turizmit të vjetër dhe oktapodit.
Projekti ka disa godina dhe një mol për ankorimin e varkave dhe jahteve përballë tij.
“Jam i lumtur të ndaj me ju projektin luksoz në qendër të Pogradecit, një projekt që do të sjellë një erë të re për qytetin” është shprehur Lilo.
Një vit më parë këtë zonë private të Pogradecit pronarët e shitën për ti hapur rrugë këtij investimi, fillimisht ishte një tjetër projekt i cili do të zbatohej por që me ndërhyrjen e kryeministrit ai u ndryshua, u ulën katet e godinave dhe u krijuan më shumë hapsira argëtuese e çlodhëse.
Ky investim në këtë zonë e cila përfshin një blloko hotelesh dhe apartamentesh do të jetë një tjetër format turizmi që Pogradeci do të ketë së shpejti duke sjellë shërbim me 5 yje.
Mësohet se projekti është miratuar në KKT dhe pritet vetëm dalja e lejes së ndërtimit për të nisur nga puna.
