Ka nisur zyrtarisht rikonstruksioni i plotë i ambienteve të Kopshtit “Liri Çomo” në Pogradec, si dhe ndërtimi i një çerdheje të re, në funksion të përmirësimit të shërbimit për fëmijët e qytetit dhe përballimit të kërkesës gjithnjë në rritje nga prindërit.
Punimet, të ndërmarra nga Bashkia Pogradec, synojnë krijimin e kushteve bashkëkohore dhe përmbushjen e standardeve moderne për edukimin parashkollor. Projekti parashikon ambiente moderne për çerdhe dhe kopsht me drekë, hapësira të reja për lojëra dhe qëndrim, si dhe instalimin e ngrohjes qendrore dhe përmirësimin e infrastrukturës ekzistuese.
Ky investim po realizohet përmes bashkëfinancimit ndërmjet Bashkisë Pogradec dhe Ministrisë së Arsimit dhe Sportit, me qëllim garantimin e mirëqenies, sigurisë dhe një shërbimi cilësor për vogëlushët.
Rikonstruksioni i Kopshtit “Liri Çomo” konsiderohet një investim i rëndësishëm për të ardhmen e Pogradecit, duke vendosur në qendër fëmijët dhe edukimin e tyre.
