Në fshatin Çezmë të Pogradecit ka ndodhur një grindje nga një grup të rinjsh. Grindja ka ndodhur për arsye banale, të rinjtë janë goditur me sende të forta duke marrë kështu dëmtime fizike dhe ndodhen në spitalin e Pogradecit për të marrë mjekimin e duhur. Një prej agresorëve është arestuar dhe 2 të tjerë janë shpallur në kërkim. Përveç plagëve të marra, ata kanë shkatuar dhe dëme materiale.
Njoftimi i Policisë;
DVP Korçë/Vihet në pranga 1 shtetas dhe shpallen në kërkim 2 të tjerë, për veprën penale të dhunës.
-Specialistët për Hetimin e Krimeve të Komisariatit të Policisë Pogradec arrestuan në flagrancë shtetasin L. B., 37 vjeç dhe shpallën në kërkim shtetasit E. B., 23 vjeç dhe A. B., 44 vjeç, të tre banues në fshatin Çezmë e Vogël, Pogradec, pasi në lokalin e shtetasit B. B., 46 vjeç, në këtë fshat, në bashkëpunim me njëri-tjetrin, kanë goditur me sende të forta shtetasit I. D., 25 vjeç dhe A. D., 25 vjeç (vëllezër), banues në fshatin Çezmë e Vogël, të cilët për pasojë kanë marrë dëmtime fizike dhe ndodhen në spitalin e Pogradecit, në kujdesin e mjekëve. Gjithashtu, tre autorët e dyshuar të ngjarjes kanë shkaktuar dëme materiale duke thyer orendi dhe pajisje në lokalin e shtetasit B. B. Vijon puna për kapjen e shtetasve E. B. dhe A. B.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
