Një ngjarje e rëndë u shënuar mengjesin e kësaj të hëne në Pogradec. Një shpërthim tritoli rreth orës 02.10 minuta ka terrorizuar bllokun e pallateve në lagjen numër 2 të qytetit.
Sipas të dhënave të policisë lënda plasëse është vendosur në sheshpushimin e një pallati në katin e dytë, pranë banesës së shtetasit Maerd Berberi, persona me precendetë penalë të shumtë dhe që pak kohë më parë u lirua nga burgu pasi përfitoi nga amnistia.
Fatmirësisht nuk ka pasur të lënduar në njerëz por vetëm dëme materiale dhe frikë në radhët e banorëve të pallateve përreth.
Në vendngjarje policia ka nisur hetimet mbi ngjarjen e rëndë ndërsa po kontrollon të gjitha kamerat e sigurisë të rrugëve dhe bizneseve për të arritur tek autori, por ende nuk ka bërë të mundur kapjen e tij.
Gjithashtu po pyeten edhe banorë të zonës, pronarët e banesës për konflikte të mundshme të afërta kohët e fundit.
Shpërthimi i këtij mëngjesi ka prishur qetësinë e qytetit liqenor i cili është në pikun e sezonit turistik dhe i mbushur me turistë.
