Pogradeci, një nga qytetet më të dashura të Shqipërisë për pushuesit vendas dhe të huaj, çel zyrtarisht sezonin veror më 31 maj, me një program të pasur festiv që përfshin aktivitete kulturore, sportive dhe muzikore përgjatë gjithë fundjavës.
Qyteti i vendosur buzë liqenit të mrekullueshëm të Ohrit është gati të mirëpresë mijëra vizitorë në një atmosferë të veçantë që përfaqëson më së miri mikpritjen pogradecare, natyrën e bukur dhe trashëgiminë kulturore të zonës. Gjatë kësaj dite, do të zhvillohen aktivitete të ndryshme për të gjitha moshat, duke nisur nga ekspozita artizanale dhe panaire produktesh tradicionale, e deri te demonstrime kulinarie me shije lokale.
Në fokus do të jenë gjithashtu sportet dhe aktivitetet në natyrë, si: turne në beach volleyball, gara me kanoe në ujërat e liqenit, demonstrime të arteve marciale, ekspozita me piktura dhe punime artizanale, si dhe shumë surpriza të tjera për fëmijë dhe të rritur.
Në mbrëmje, atmosfera do të ndizet nga koncerti festiv ku do të performojnë emra të dashur të skenës shqiptare si Sardi Strugaj, Eli Fara, ndërsa parodistët e Vlorës do të sjellin humor dhe të qeshura për publikun.
Ky event që çel sezonin turistik veror është më shumë se një festë, është një ftesë për të zbuluar gjithçka që Pogradeci ofron: natyrë e mbrojtur, liqen i kristaltë, histori, kulturë, kuzhinë tradicionale dhe një atmosferë relaksuese që e bën këtë qytet një destinacion ideal për pushime familjare apo aventurierë.
