16 vite pas fillimit të koncensionarit “Aleat”, qeveria shqiptare ka vendosur të ngrejë një kompani të re shtetërore për prodhimin e dokumenteve biometrike, ITENTITEK SHA.
“Aleat”, kompania koncensionare që ofron shërbimin e prodhimit të dokumenteve biometrike, pasaportë dhe kartë identiteti, prej 16 vitesh, nuk do të ketë rinovim kontrate me qeverinë shqiptare. Në muajin korrik 2023 përmbyllet kontrata 10 vjeçare e firmosur në maj të vitit 2013.
Ministria e Brendshme dhe “ALEAT” informojnë qytetarët se:
- Afati i fundit i aplikimit për Letërnjoftimin (kartën e identitetit) dhe Pasaportat, me kupon ALEAT, është data 26 korrik 2023;
- Zyrat e Shpërndarjes Aleat në Rajonet e Policisë janë të hapura vetëm për tërheqje të pasaportës deri më 28 korrik 2023;
- Prej 1 gushtit 2023 e në vijim shërbimi do të vijojë të ofrohet pandërprerje për qytetarët nga shoqëria publike “IDENTITEK SHA” dhe kuponët do të gjenden në të gjitha Zyrat Postare.
Ky është koncensioni i dytë brenda pak kohësh që kalon nga koncensionari në duar të shtetit, pas atij të kontrollit teknik të automjeteve.
Të gjitha asetet që janë krijuar nga kompania koncensionare, si burimet njerëzore, vendet e aplikimeve dhe pajisjet e investuara ndër vite, pritet t’i kalojnë kompanisë shtetërore, kjo e parashikuar që në kontratë dhe këtu nuk përfshihet problematikat dhe amortizimi i këtyre pajisjeve.
Aktualisht, shqiptarët, për të prodhuar një pasaportë personale duhet të paguajnë 7,500 lekë të reja për një afat 15 ditor, ndërsa në një afat të përshpejtuar në vetëm 2 apo 3 ditë duhet të paguajnë 18,000 mijë lekë, ndërsa për prodhimin e kartës së identitetit duhen 1,500 lekë.
Me kalimin e prodhimit të këtyre dokumenteve në duar të shtetit është hedhur ideja e uljes së çmimeve, por akoma nuk ka një vendimmarrje. Duke qenë se pasaporta është dokument jo i detyrueshëm dhe mund të bëhet me dëshirë, nuk priten shumë surpriza në ulje çmimi, por një gjë e tillë mund të bëhet me kartën e identitetit, e cila është e detyrueshme për personat mbi 16 vjeç.
