Banorët e fshatit Qinam në Kolonjë protestuan këtë të shtunë kundër projektit për vendosjen e paneleve fotovoltaike në zonat e kullotave, të cilat prej dekadash përbëjnë burimin kryesor të jetesës për dhjetëra familje që merren me blegtori. Sipas tyre, humbja e këtyre hapësirave do të përkthehej në ndërprerje të aktivitetit ekonomik dhe braktisje të detyruar të fshatit.
Ata shprehen se edhe pse bashkia ka zhvilluar takime me komunitetin, vendimet po merren pa u marrë në konsideratë shqetësimet e tyre, duke i lënë banorët pa zë në procesin vendimmarrës.
Fshatarët theksojnë se tokat kullosore dhe arat që parashikohen të kthehen në park diellor janë të ndara mes familjeve brez pas brezi. Në këto sipërfaqe ushqehen rreth 3000–4000 krerë bagëti, përfshirë afro 600 lopë. Humbja e tyre, sipas banorëve, do të ndikojë drejtpërdrejt në ndërprerjen e zinxhirit bujqësor dhe blegtoral të zonës.
Fermerë të tjerë paralajmërojnë se instalimi i paneleve diellore rrezikon zhdukjen e plotë të edhe 10 familjeve të fundit që sigurojnë të ardhurat vetëm nga blegtoria.
Banorët u bëjnë apel autoriteteve që të ndërhyjnë me urgjencë për të mbrojtur kullotat dhe për të mos lejuar shkatërrimin e mënyrës tradicionale të jetesës në fshat.
