Trajneri i Skënderbeut, Ernest Gjoka, e sheh si të pabesueshme humbjen përballë Partizanit, pasi mendon se ekipi i tij ka humbur një mundësi të qartë për të marrë tre pikët.
“Futbolli i tillë është, kur ti nuk mundëson të shënosh rastet që ke, të kthehet ndonjëherë në bumerang, si na u kthye sot. Kishim mundësitë të çonim ndeshjen ne 2-0 dhe më shumë. Mendoj se skuadra u mundua të bënte gjithçka, por nuk bëri atë që është kryesorja, të ruante avantazhin dhe të bënte golin e dytë.
Mendoj se nuk kishte surprizë Partizani. Mendoj se nuk kemi për të pasur më kurrë një mbrojtje si e Partizanit me më shumë raste që kemi dalë mbi 5-6 herë vetëm me portierin. Mendoj se heroi i ndeshjes sot ishte portieri i Partizanit dhe gabimet e sulmuesve tanë. Për këtë ndjej keqardhje që me një mbrojtje të tillë, të kesh aq shumë raste dhe të mos fitosh e për më tepër të humbësh ndeshjen, kjo është diçka jo e mirë. Gjithsesi ne luftën do ta vazhdojmë.
A na kënaqte barazimi? Sigurisht do na kënaqte si është situata. Por i kishim të gjitha mundësitë sot për të fituar ndeshjen. Sigurisht kishim njëfarë lodhje në mesin e fushës ku kishim pikën më të fortë. Ama e përsërit që një ndeshje e tillë nuk duhet të humbet. Duhet të marrim përgjegjësitë nga i pari te i fundit, duke filluar nga unë, Nuk do të gjejmë kurrë më një skuadër që të na japë kaq shumë mundësi në fazën tonë sulmuese për të shënuar gol.
Mungesa e Dumfur? Çdo lojtar që e nis nga fillimi, na mungon se kjo skuadër jemi.
Nuk është çështje presingu, por është normale që kur je 1-0, duhet të jesh i kujdesshëm dhe vrasësh ndeshjet me rastet që ke. Ne kështu e ndërtuam dhe kishim të gjithë mundësinë që të vritnim ndeshjen me disa raste, raste, raste , raste, raste… Nuk ishte çështje e Partizanit, ishte çështja jonë. Ne e bëmë gabimin, Partizani përfitoi nga gabimi ynë”, tha Gjoka pas ndeshjes.
