Reagon edhe kryetari i bashkisë Korçë, Sotiraq Filo, mbi universitetin “Fan S.Noli”.
“Në lidhje me debatin e këtyre ditëve për Universitetin e Korçës.Kam pritur daljen e djeshme me një qëndrim zyrtar të Universitetit “Fan Noli” në Korçë për të shprehur qëndrimin tim lidhur me këtë çështje.Për Korçën e arsimit, Korçën e së parës shkollë shqipe në Shqipëri, prezenca e një institucioni prestigjioz të arsimit të lartë shqiptar është një vlerë e çmuar.
Ka rreth gjysëm shekulli që Korça ka universitet publik. Në respekt të plotë të autonomisë të universitetit mendoj se çdo vendimmarrje e lidhur me ekzistencën dhe vijueshmërinë e këtij institucioni duhet t’i përfshijë të gjithë aktorët, duke filluar pa dyshim me profesoratin, studentët, për të vazhduar me institucionet dhe banorët e Korçës.
Universiteti është i të gjithëve, vlerë e çmuar e mendimit intelektual, zhvillimor dhe progresiv të lokalitetit, me ndikim në jetën sociale dhe ekonomike e si e tillë, moralisht çdo qëndrim, për ekzistencën, vijueshmërinë dhe cilësinë e universitetit na takon të gjithëve.
Le të jetë ky moment një reflektim nga ana e universitetit për përshtatjen e degëve dhe programeve të studimit sipas tregut të punës, interesave të të rinjve dhe politikave zhvillimore të Korçës duke u kthyer në një aktor të rëndësishëm zhvillimor me mendimin profesional dhe kërkimin shkencor.
Vetëm kështu Universiteti i Korçës do vijojë të qëndrojë me dinjitet krahas universiteteve të tjera publike në vend dhe do të jetë vlerë e çmuar për Korçën,” – ka shkruar ai në faqen e tij facebook.
