Gjatë orëve të mesnatës, qarku i Korçës është përfshirë nga reshje dëbore me intensitet të ulët, të shoqëruara me temperatura të ulëta që kanë zbritur deri në -7 gradë Celsius. Pavarësisht kushteve dimërore, situata në akset rrugore paraqitet e qëndrueshme dhe pa problematika.
Në aksin kryesor Qafë Thanë – Pogradec – Korçë – Dogana Kapshticë, janë regjistruar reshje të pakta bore. Gjatë natës është punuar për pastrimin dhe kriposjen e rrugës, ndërsa aktualisht aksi është plotësisht i kalueshëm.
Reshje dëbore janë shënuar edhe në akset Zëmblak – Goricë dhe Korçë – Ersekë, ku ekipet kanë punuar gjatë gjithë natës për pastrim dhe kriposje. Qarkullimi vijon normal, ndërsa rekomandohet përdorimi i gomave dimërore.
Në segmentet Kthesa e Boboshticës – Dardhë, Lapidar Podgorie – Podgorie – Liqenas, janë regjistruar reshje të lehta bore dhe temperatura të ulëta. Kriposja e këtyre segmenteve ka nisur që prej orës 02:00 të mëngjesit, ndërsa qarkullimi rekomandohet me goma dimërore.
Gjatë natës, reshje të lehta dëbore janë shënuar edhe në akset Libonik – Rëmbec – Plasë dhe Korçë – Voskopojë. Janë kryer punime për pastrim dhe kriposje, pa u raportuar probleme, ndërsa qarkullimi vijon normal.
Situatë e ngjashme paraqitet edhe në aksin Ersekë – Leskovik, ku janë kryer pastrimet dhe kriposjet e nevojshme.
Reshje të imta dëbore dhe temperatura të ulëta janë shënuar edhe në segmentin Maliq – Lozhan – Popçisht – Moglicë, ku ekipet kanë punuar për pastrimin e trupit të rrugës dhe kriposjen.
Autoritetet bëjnë me dije se kontraktorët e mirëmbajtjes janë në gatishmëri të plotë për mirëmbajtjen dimërore, ndërsa drejtuesit e mjeteve këshillohen të tregojnë kujdes të shtuar dhe të respektojnë sinjalistikën rrugore.
