Pogradeci rikthen sportet ujore në liqen për të dytin vit radhazi, falë iniciativës së dy ish-kampionëve të notit, Sotiraq Iftica dhe Vladimir Mato. Pishinat e hapura të instaluara në brigjet e liqenit janë kthyer në një qendër trajnimi për të rinjtë dhe një arenë garash gjatë gjithë verës.
Risia e këtij sezoni është rikthimi i “futbollit të ujit” (water polo), një sport që nuk është zhvilluar në Shqipëri për më shumë se katër dekada. Objektivi i kësaj nisme është të trajnohen të rinjtë dhe të formohet një ekip lokal, duke e bërë Pogradecin një pikë referimi për këtë disiplinë sportive.
Llazi Kërxhalli, një prej figurave historike të ekipit të dikurshëm të Pogradecit dhe trajner i njohur i volejbollit, ka vlerësuar përpjekjet për ringjalljen e këtij sporti të harruar, duke theksuar rëndësinë e aktiviteteve që i japin jetë liqenit dhe promovojnë sportin tek brezat e rinj.
Gjatë muajit qershor dhe korrik janë planifikuar gara noti me pjesëmarrje kombëtare dhe ndërkombëtare, si dhe maratona tradicionale “Agron Ruvina”, një prej eventeve më të rëndësishme sportive të qytetit.
