Procesi i restaurimit dhe konservimit të ikonës së rrallë “Shën Kolli”, me origjinë nga fshati Shamoll i Korçës, ka përfunduar me sukses, duke i kthyer asaj pamjen dhe shkëlqimin e dikurshëm.
Ikona kishte pësuar dëmtime të dukshme nga kushtet e pafavorshme, kryesisht lagështira, që kishin çuar në rrëzimin e një pjese të shtresës pikturale dhe zbulimin e gruntit të bardhë. Verniku ishte errësuar dhe oksiduar, duke humbur transparencën dhe mbrojtjen origjinale.
Specialistët ndërhynë duke konsoliduar shtresën e gruntit dhe atë të pikturës, larguan vernikun e degraduar dhe kryen ndërhyrje estetike të kujdesshme, duke rikthyer harmoninë e ngjyrave dhe detajeve.
Pas përfundimit të procesit, ikona “Shën Kolli” jo vetëm që u shpëtua nga degradimi i mëtejshëm, por u rikthye në formën e saj artistike e shpirtërore të dikurshme.
