Me nisjen e sezonit veror, në Pogradec janë shtuar kontrollet për të garantuar sigurinë e pushuesve, veçanërisht në zonat bregliqenore. Policia Kufitare ka intensifikuar patrullimet me mjete ujore dhe tokësore, ndërsa këtë vit janë shtuar edhe pajisjet teknologjike si dronët, të cilët ndihmojnë në monitorimin dhe kontrollin e kufirit liqenor.
Masat synojnë parandalimin e incidenteve ujore, sidomos ato që lidhen me përdorimin e mjeteve lundruese motorike, të cilat në sezonet e kaluara kanë krijuar shqetësime për sigurinë e qytetarëve.
Nga ana tjetër, Bashkia e Pogradecit ka ndërmarrë hapa konkretë për të rritur sigurinë në plazhe. Drejtoresha e Tatim-Taksave në Bashkinë Pogradec, Enjela Karafili, tha se janë vendosur sinjalistika ujore (bova) për të ndarë zonat e lejuara për lundrim nga ato për not. Po ashtu, janë vendosur vëzhgues të vijës liqenore në plazhet publike, ndërsa në plazhet private kjo detyrë i takon vetë subjekteve, sipas kushteve të lejes.
“Masat janë marrë në kohë dhe në bashkëpunim të ngushtë me Taskforcën për sezonin veror dhe me Policinë Kufitare. Ky bashkëpunim është kyç për sigurinë e pushuesve,” – tha Karafili.
Ndërkohë, tre ditë më parë, falë gatishmërisë së strukturave, Policia Kufitare arriti të shpëtojë dy peshkatarë që u zunë nga një stuhi e befasishme në liqen. Monitorimi do të vijojë gjatë gjithë sezonit, në të gjithë segmentin shqiptar të Liqenit të Ohrit.
