Fshati Selcë në Mokër të Pogradecit, i njohur për historinë dhe varret monumentale ilire, po rikthehet në qendër të vëmendjes si një destinacion turistik i rëndësishëm në juglindje të vendit.
Vitet e fundit, largimi i banorëve drejt zonave urbane ka ndikuar në rrallimin e popullsisë, por ndërtimi i rrugës Qukës – Qafë Plloçë ka nisur të sjellë ndryshime pozitive. Rikthimi i disa banorëve ka ndihmuar në gjallërimin e zonës përmes investimeve në bujtina dhe shërbime për turistët.
Ilirjan dhe Marsid Oparaku janë dy nga banorët që kanë braktisur emigrimin për të ndërtuar bujtina në Selcë, duke promovuar gatimet tradicionale dhe mikpritjen e zonës.
Ilirjan Oparaku shprehet se pas 20 vitesh emigrim, vendosi të investojë në fshatin e tij. “Kemi punuar me sezone në Greqi, shkonim e vinim. Vendosa të promovoj ushqimet e fshatit dhe të krijojmë kushte për turistët që vizitojnë varret ilire. Me hapjen e rrugës, presim që numri i vizitorëve të rritet ndjeshëm.”
Marsid Oparaku tregon se gjithmonë e ka pasur këtë ide dhe hapja e rrugës e nxiti ta realizonte. “Kemi ushqime të zonës, nuk eksperimentojmë. Idea është të blejmë nga fshatarët dhe të ofrojmë produkte të freskëta për vizitorët.”
Banorët shpresojnë që infrastruktura e përmirësuar dhe shërbimet e reja të nxisin qëndrimin më të gjatë të turistëve në zonë.
Besnik Xhyra, një tjetër banor i Selcës, thotë se mungesa e shërbimeve ka qenë një pengesë për zhvillimin e turizmit. “Mendohet se vijnë rreth 5000 turistë në vit, por ata largohen shpejt për shkak të mungesës së shërbimeve dhe kushteve për të shijuar gatimet tradicionale të zonës.”
Selca e Poshtme, me trashëgiminë kulturore dhe natyrore, po bëhet gjithnjë e më tërheqëse për turistët vendas dhe të huaj, duke krijuar mundësi për zhvillimin e qëndrueshëm të zonës.
