Partizani për meshkuj dhe Skënderbeu për femra fitojnë Kupën e Ligës “Gjergj Kastrioti” pas dy ndeshjeve finale me Tiranën e Dritën.
Te dyja ndeshjet kanë përfunduar me të njëjtin rezultat, 3-0 por duhet thënë se të dy finalet në të gjashtë setet e luajta kanë patur rivalitet deri në pikët e fundit, në veçanti finalja e femrave.
Partizani i Ylli Tomorit ja ka dalë të mundë Tiranën pasi ia ka izoluar mjaft mirë pikat goditëse me bllok dysh dhe tresh.
Partizani e ka fituar finalen me Tiranën edhe sepse ka qënë i suksesshëm në pozicionin 3 por dhe në katërsh, nga ana tjetër Tirana nuk ishte ajo skuadër që pritej sepse linja e organizimit nuk ka funksionuar mirë, gjë e cila është pranuar pse takimit edhe trajneri Ylli Tomori si dhe volejbollisti Raul Sabliqi.
Cutinho është vlerësuar si lojtari më i mirë i finaleve, volejbollist që nuk ka fshehur emocionet pas fitimit të trofeut.
Në një pallat sporti të mbushur plot është luajtur finalja e dytë e Ligës “Gjergj Kastrioti” ajo mes Skënderbeut dhe Dritës, finale e cila në dy setet e para ka kërkuar pikët shtesë për fituesin. Sete që janë fituar nga Skënderbeu me rezultatin 26-24
Me sete të fituara korçaret i kanë bërë gjërat më të thjeshta në setin e tretë, të cilin e kanë mbyllur 25-15 dhe krejt takimin 3-0, duke u bërë kështu për herë të dytë rradhazi fitues të kësaj lige.
Trajneri Orlando Koja si dhe Vivas kanë siguruar pas trofeut të ligës, ky Skënderbe synon titullin kampion.
“Për mua është emocion i madh të shpallem lojtarja me e mirë e Kupës. Patjetër që seti i parë pati pak emocione por në të tjerat kemi vallëzuar mbi parket. Jam shumë e lumtur që fituam dhe patjetër që do të fitojmë dhe titullin kampion në kampionat” – u shpreh Victoria Vivas.
Lorik Iljazi, trajner i ekipit të Dritës pas finales tha se kjo kupë është shumë herë më cilësore se të dyja kampionatet, ai i Kosovës dhe i Shqipërisë pasi në këtë event luajnë 4 ekipet më të mira shqipfolëse. Nisur nga kjo, kosovari i Dritës nuk e përjashton mundësinë për organizimin e një kampionati unik mes dy vendeve.
Në finalet e Ligës “Gjergj Kastrioti” kanë marrë pjesë për femra Drita, Tirana, Skënderbeu e Partizani ndërsa për meshkuj Tirana, Ferizaj, Partizani dhe Peja.
