Juristja Brizilda Gjikondi ka dalë hapur kundër propozimit për shkrirjen e Bashkisë së Maliqit dhe bashkimin e saj me atë të Korçës, duke e cilësuar këtë nismë si një padrejtësi të madhe ndaj banorëve lokalë. Sipas saj, ky proces nuk është një reformë për zhvillim, por një përpjekje për të zhbërë një nga njësitë vendore më të mëdha në vend.
Duke theksuar rëndësinë e zonës, Gjikondi nënvizoi se Maliqi renditet si bashkia e 14-të në Republikë për nga madhësia dhe nuk meriton të humbasë statusin e tij administrativ. “Maliqit i bënë pabesi me shkrirjen. Është bashkia e 14-të në Republikë. Banorët janë njerëz të qetë dhe të duruar, e puntore por kjo nuk do të thotë se mund të anashkalohen,” u shpreh ajo, duke kërkuar respektimin e vullnetit të qytetarëve.
Kritika ndaj drejtuesve politikë të qarkut
Në reagimin e saj, juristja drejtoi kritika të ashpra ndaj drejtuesve politikë të qarkut, duke përmendur specifikisht deputetët Niko Peleshi dhe Ilir Pendavinji për qasjen e tyre ndaj kësaj zone. Ajo ngriti pikëpyetje mbi moralin politik të atyre që marrin vendime pa u konsultuar me komunitetin. “Nuk e kuptoj si mund të merret një vendim i tillë pa pyetur banorët e Maliqit dhe më pas të kërkohen sërish votat e tyre. Politikanët nuk mund të flasin për moral e përfaqësim, ndërkohë që nuk dëgjojnë zërin e qytetarëve,” deklaroi Gjikondi.
Pavarësisht propozimit aktual, Gjikondi shprehu bindjen se kjo reformë nuk do të miratohet në formën e paraqitur. Ajo e cilësoi këtë situatë si një moment ku po zbulohet fytyra e vërtetë e klasës politike, duke e quajtur planin cinik, mediokër dhe një taktikë për mbijetesë personale e politike. Sipas saj, shqiptarët po i njohin politikanët përtej maskës dhe qetësisë së shtirur, pasi fasada po bie dhe e vërteta po del në pah.
Foto: Korça Blog
