Shpella e Trenit ndodhet në rrethin e Devollit e njohur edhe si “Gryka e Ujkut”, është e vendosur në pjesën perëndimore të liqenit të Prespës së Vogël dhe daton nga viti 6000 p.e.s.
Ajo vazhdon të studiohet edhe në ditët e sotme për vlerat e saj historike dhe natyrore. Ka qenë vendbanim prehistorik i njeriut të lashtë, nga neoliti i hershëm deri në epokën e hekurit.
Në brendësi të saj shpella është e gdhendur me piktura të mrekullueshme murale prehistorike kryesisht me skena gjahu. Brenda shpellës gjatë verës gjen koloni prej 2000-2500 lakuriqë nate por edhe specie insektesh dhe jorruazorë të tjerë, karakteristike e shpellave të errëta.
Piktura e Trenit gjendet buzë liqenit të Prespës së Vogël, e bërë në faqen e shkëmbit të Spilesë, që njihet nga vendasit me emrin “Shpella e shkruar”.
Ajo paraqet një skenë gjuetie ku katër kalorës me qentë e tyre ndjekin një dre. Figurat janë paraqitur në siluetë, të bëra me bojë të bardhë.
Shpella e Trenit në rrethin e Devollit është një aset i trashëgimisë historike në rajonin juglindor. Arkeologët shprehen se shpella e Trenit dhe zona në afërsi të saj është bërë objekt gërmimesh dhe ekspeditash arkeologjike që në vitin 1966, duke zbuluar objekte me vlera në të.
Por, kalaja e Trenit që shënon dhe fillimin e fortifikimeve në këtë zonë tashmë nuk ka asnjë gjurmë të mureve të saj.Në sezonin veror, kjo shpellë vizitohet nga shumë turistë vendas dhw të huaj si edhe kuriozë të natyrës e historisë. Shpellën e Trenit mund ta vizitoni duke ndjekur rrugën automobilistike Korçë – Bilisht – Tren – Liqeni i Prespës së Vogël.
