Skënderbeu përgatit një lëvizje të bujshme në merkato. Bëhet fjalë për një tjetër shitje të madhe, që do të sjellë të ardhura të konsiderueshme në klubin korçar.
Ermir Rashica është kthyer në xhevahirin e klubit bardhekuq në këtë hapësirë transferimesh. Edhe pse në Korçë po mundohen ta mbajnë të fshehtë, sulmuesi kosovar pritet që shumë shpejt të transferohet te Metalist Kharkiv.
Burime bëjnë me dije se pas ndeshjes që korçarët do të luajnë kundër Vllaznisë, e vlefshme për javën e 20-të të Superiores, Rashica menjëherë pas këtij takimi do të udhëtojë drejt Ukrainës. Bëhet fjalë për një ofertë të parefuzueshme nga korçarët, që kap një vlerë prej gati 800 mije eurosh, por me kushtin e finalizimit të transferimit në verën e 2025. Kjo është ajo që korçarët po presin për të shtuar financat, por edhe për të mos humbur cilësinë në këtë sezon në fazën sulmuese.
Edhe pse gjithçka po punohet nga klubi bardhekuq në fshehtësi, gazeta ka mundur ta mësojë se Rashica prej datës 20 janar do të udhëtojë për të kryer testet dhe për të mbyllur marrëveshjen me Metalistin, aty ku së fundmi është transferuar edhe Kristian Mba i Partizanit.
Në lojë për Rashicën është edhe klubi tjetër ukrainas LNZ Cherkasy. Në kushte të tilla korçarët presin të mbyllin një marrëveshje të rëndësishme për të rregulluar anën financiare të klubit, me qëllim për të pasur një siguri më shumë në sezonin e ri, kohë kur korçarët do të përgatiten për të synuar angazhimet europiane pas përfundimit të dënimit.
NDESHJA – Përtej lëvizjeve në merkato, korçarët janë të përqendruar te ndeshja e radhës në kampionat. Kjo sfidë, përtej vështirësive, është e rëndësishme për bardhekuqtë, që kërkojnë pikët maksimale për tu shkëputur nga fundi i klasifikimit.
Dilema e vetme për Gjokën duket se është gjendja e Randit, i cili për momentin pritet të përfundojë në tribunë për shkak të problemeve fizike. Vendin e tij në qendër të mbrojtjes do ta zërë Ramos me kapitenin Prençi dhe pjesa tjetër e ekipit do të jetë e njëjta me atë që ka zbritur në fushë ndaj Partizanit.
