Dy gola të shënuar në dy takime kanë mjaftuar për t’i dhënë fitoren Skënderbeut, edhe për faktin se në prapavijë bardhekuqtë u falen ndërhyrjeve vendimtare të portierit Marko Alia.
Ish-gardiani i Lacios ka bërë superparaqitje ndaj Egnatias, e sidomos ndaj Dinamos, me ndërhyrje vendimtare që e kanë mbajtur të paprekur portën e korçarëve. Në dy ndeshje zero gola të pësuar tregojnë jo vetëm soliditetin e mbrojtjes korçare, por edhe meritën e patjetërsueshme të portierit Alia. Në një prononcim të dhënë për “Panorama Sport”, Marko Alia flet për dy fitoret e ekipit.
“Është një tjetër fitore e rëndësishme, e cila konfirmon momentin e mirë që po kalojmë. Ndeshja nuk ka qenë e lehtë dhe një gjë të tillë e dinim. Ishim të përgatitur për ndeshje të fortë dhe e kishim studiuar mirë kundërshtarin. Kemi një ekip të mirë dhe me shumë cilësi, por ajo që është më e rëndësishmja është fakti se të gjithë lojtarët sakrifikojmë për këtë fanellë. Është e drejtë që janë dy ndeshje pa pësuar gol dhe për këtë më vjen shumë mirë. Shpresoj të zgjasë sa më shumë. Por nuk është vetëm merita ime. Është i gjithë ekipi që mbron në bllok dhe sulmojmë po në bllok. Të gëzojmë këtë fitore dhe prej së hënës do të mendojmë për ndeshjen e radhës që kërkon më shumë impenjim”, deklaroi Alia.
E vetmja notë negative deri më tani për portierin është fakti që në dy ndeshjet e para me fanellën e Skënderbeut ka marrë dy kartonë të verdhë radhazi. Diçka e rrallë për një portier, por tashmë Alia duhet të jetë më i kujdesshëm, pasi një karton i tretë do ta penalizojë me mungesë në ndeshjen e radhës që do të ketë.
