Korça dhe fshatrat turistikë të Voskopojës, Dardhës e Boboshticës edhe gjatë muajit shtator janë të vizituara nga turistët e huaj, kryesisht ata që vijnë nga Europa Perëndimore të cilët janë të interesuar për monumentet e trashëgimisë kulturore dhe sajtet arkeologjike.
Një grup turistësh spanjollë që vijnë për herë të parë tregojnë se u bën përshtypje mikpritja e banorëve të qytetit dhe pastërtia që gjejnë.
“Është hera ime e parë në Shqipëri. E vërteta është se është vend shumë i bukur dhe pastër, më bën përshtypje dashuria që falni dhe qetësia që gjejmë“- tha një tjetër turiste spanjolle.
“Po shoh pikturën e plotë, atë që kemi dëgjuar, historiane që na kanë thënë për shqiptarët dhe atë që shoh vet. Ndryshimi është i madh. Njerëzit janë shumë të sjellshëm, shumë të buzëqeshur”, – tha e huaja që vizitonte Korçën për herë të parë.
“Ajo që më pëlqen nga Korça janë hapësirat e hapura, e shoh me të pastër se qytetet e tjera të Shqipërisë. Shoh një qetësi, trafik nuk ka, njerëzit ecin ngadalë, buzëqeshin, ka paqe. Më shijon ushqimi juaj dhe freskia e motit” – tha turisti.
“Korça është fenomenale. E gjithë Shqipëria në fakt është shumë e bukur. Me pelqyen monumentet me tepër. Kisha dëgjuar për Shqipërinë gjëra të tjera e shoh të tjera“, – u shpreh një tjetër turiste.
Agron Miri është guida turistike që shoqëron turistët, i cili tregon se është vet historia e Shqipërisë ajo që tërheq vëmendjen e turistëve.
Ndryshe nga një vit më parë, këtë vit operatorët turistike të juglindjes së vendit bëjnë të ditur se edhe muaji Tetor është i rezervuar me turistë të huaj.
