“Sporti është garë, por mbi të gjitha është respekt.”
Kështu e nis reagimin e tij publik Administratori i Qendrës Multifunksionale të Pogradecit, Dorian Latifllari, i cili i drejtohet me tone të përmbajtura por të qarta trajnerit të Dinamos, Orlando Koja, pas disa deklaratave të këtij të fundit në media që kanë ngjallur reagime në radhët e sportdashësve pogradecarë.
Latifllari thotë se ka pasur “pritshmëri të mëdha” ndaj trajnerit, jo vetëm për arsye profesionale, por edhe për trashëgiminë familjare që ai mbart.
“Respekti im për ju vinte jo vetëm nga puna si trajner, por edhe nga mbiemri që mbani — një mbiemër që ka lënë gjurmë të mëdha në historinë e volejbollit shqiptar,” – shkruan ai.
Megjithatë, zhgënjimi, siç pohon administratori pogradecar, ka ardhur nga mënyra se si trajneri ka zgjedhur të komentojë pas ndeshjeve:
“Në çdo dalje tuajën, shpesh kërkoni fajin tek kundërshtari, sikur ai të mos ketë të drejtë të hyjë në fushë për të fituar. Ne, përkundrazi, kur humbasim, analizojmë gabimet tona, jo justifikimet jashtë vetes.”
Në shkrimin e tij, Latifllari thekson se Pogradeci, pavarësisht përmasave të vogla, është një qytet që ka ditur gjithmonë të respektojë sportin dhe kundërshtarët.
“Pogradeci është qytet i vogël, por me shpirt të madh. Ju ka pritur dhe përcjellë me respekt, si kur drejtonit Skënderbeun, ashtu edhe sot me Dinamon,” – thekson ai, duke shtuar se “asnjëherë përpjekjet tona nuk duhet të nënvlerësohen apo ironizohen”.
Ai ndalet edhe te mënyra si duhet parë sporti në ditët e sotme:
“Ne hyjmë në çdo ndeshje për të fituar, pse jo edhe për titullin kampion, por qëllimi ynë kryesor është ta shohim sportin si argëtim, si akt miqësie dhe respekti për publikun dhe qytetin tonë.”
Në të njëjtën linjë, Latifllari nuk heziton të ngrejë shqetësimin për deklaratat që, sipas tij, kalojnë kufirin e frymës sportive:
“Një trajner shkëlqen duke u marrë me trajnimin e ekipit, jo me intervista apo komente në rrjete sociale. Lërini drejtuesit e klubeve të merren institucionalisht me njëri-tjetrin,” – shkruan ai me tone këshilluese.
Në fund, administratori i QMP Pogradec mbyll me një ironi të lehtë, përzier me frymë qytetarie dhe sportivitet:
“Tani që keni gjetur ‘armiqtë’ tuaj në aksin Shkodër–Pogradec, po e mbyll me një shprehje shkodrane: ‘Të hyftë vedi në qef.’ Ne, si pogradecarë, do të vazhdojmë t’ju presim dhe t’ju përcjellim me respekt e mikpritje, ashtu siç i ka hije qytetit tonë të vogël e fisnik.”
