Të paktën nëntë persona kanë humbur jetën dhe 23 të tjerë kanë mbetur të plagosur pasi Rusia goditi kryeqytetin e Ukrainës, Kievin, me raketa balistike në orët e para të mëngjesit të së shtunës. Sipas shërbimeve emergjente, disa qytetarë kanë mbetur të bllokuar brenda një ndërtese e cila është shembur pjesërisht nga sulmi.
Gjatë momentit të sulmit, kryetari i bashkisë së Kievit, Vitaliy Klitschko, u bëri thirrje qytetarëve përmes rrjetit Telegram të mbroheshin. “Shpërthime në qytet. Kievi është nën sulm me raketa balistike. Qëndroni në strehimore!” shkroi ai. Ndërkohë, agjencia e lajmeve Reuters, duke iu referuar dëshmitarëve në terren, raportoi se u dëgjuan më shumë se një duzinë shpërthimesh në të gjithë qytetin. Këto sulme vijnë në një moment kritik kur Ukraina po përballet me mungesa të theksuara të sistemeve të mbrojtjes ajrore, të cilat janë të domosdoshme për të rrëzuar raketat balistike me shpejtësi të lartë.
Kërkesa për raketat Patriot dhe ngurrimi i Uashingtonit
Përballë kësaj situate, presidenti ukrainas, Volodymyr Zelensky, ka intensifikuar thirrjet drejt aleatëve perëndimorë për më shumë ndihmë ushtarake. Ai i ka kërkuar vazhdimisht Uashingtonit të zbatojë premtimin për t’i dhënë Ukrainës licencat për prodhimin e sistemeve të mbrojtjes ajrore Patriot. Më 9 korrik, Zelensky kishte deklaruar se ishte arritur një marrëveshje për licencat e prodhimit të raketave interceptuese PAC-3 Patriot, duke theksuar se pjesët pritej të mbërrinin brenda pak ditësh.
Megjithatë, të premten, presidenti amerikan Donald Trump tregoi shenja ngurrimi lidhur me këtë çështje, duke ndryshuar qëndrimin e mëparshëm se Uashingtoni ishte gati t’i jepte Kievit licencën e prodhimit. Gjatë një mbledhjeje të kabinetit në Camp David, Trump u shpreh para gazetarëve: “Këto armë janë të jashtëzakonshme. Duhet të jemi shumë të kujdesshëm kur bëhet fjalë për t’i lejuar dikujt t’i prodhojë ato”. Ai shtoi se administrata e tij “ende nuk është pajtuar” për një hap të tillë, duke theksuar: “Po diskutojmë për këtë. Por, është e vështirë ta dhurosh një teknologji të tillë”.
Prioriteti i mbrojtjes ajrore për Ukrainën
Këto zhvillime vijnë pas kthimit të presidentit Zelensky në Kiev nga Uashingtoni, ku ai kishte zhvilluar një takim të përshkruar si “i mirë” në Shtëpinë e Bardhë. Të premten, pas një bisede telefonike me nënpresidentin amerikan JD Vance, Zelensky rikonfirmoi nevojën urgjente të vendit të tij përmes një mesazhi në Telegram. “Ndërsa sulmet ajrore ruse ndaj vendit tonë vazhdojnë pa ndërprerje, mbrojtja ajrore – veçanërisht raketat Patriot – mbetet prioriteti jonë kryesor”, deklaroi kreu i shtetit ukrainas.
