Këshilli i Ministrave ka pezulluar zyrtarisht të gjitha aktivitetet e ndërtimit në zonat bregdetare, zonat e mbrojtura me funksion turistik, si dhe në qendrat historike dhe ato urbane historike. Ky vendim, i cili ka hyrë në fuqi pas botimit në Fletoren Zyrtare, parashikon një gjobë prej 2 milionë lekësh për çdo subjekt që shkel rregullat e reja gjatë sezonit veror.
Ministri i Turizmit, Blendi Gonxhja, ka sqaruar se ky hap është ndërmarrë për të siguruar mbarëvajtjen e sezonit dhe për të shmangur ndotjen akustike dhe mjedisore. Sipas tij: “Periudha e pezullimit fillon me hyrjen në fuqi të këtij vendimi dhe përfundon më 15 shtator 2026. Kjo masë synon të garantojë zhvillimin normal të sezonit turistik, mbrojtjen e destinacioneve turistike dhe një mjedis më të qetë e cilësor për qytetarët dhe vizitorët”.
Aktivitetet e ndaluara në zonat turistike
Gjatë kësaj periudhe, bllokohen plotësisht punimet në karriera, pikat e nxjerrjes, përpunimit dhe shfrytëzimit të inerteve, si dhe çdo aktivitet tjetër i lidhur me to. Gjithashtu, ndalohen në mënyrë kategorike punimet e ndërtimit që nisin nga faza e gërmimit dhe hedhjes së themeleve, deri në përfundimin e ngritjes së karabinasë së objektit. Çdo veprimtari që shkakton zhurmë, pluhur apo ndotje të mjedisit është rreptësisht e ndaluar.
Pezullimi nuk kufizohet vetëm brenda vijës së përcaktuar të zonave turistike. Ai zbatohet edhe për punime ndërtimi jashtë këtyre territoreve, në rastet kur natyra, vendndodhja ose mënyra e ushtrimit të tyre mund të ndikojnë negativisht në zhvillimin normal të aktivitetit turistik.
Përjashtimet dhe afatet e lejeve të ndërtimit
Pavarësisht masave të rrepta, vendimi qeveritar parashikon disa përjashtime specifike. Nga pezullimi përjashtohen punimet e rifiniturave të brendshme dhe punimet e vogla që kryhen pas përfundimit të ngritjes së karabinasë. Po ashtu, lejohet ngritja apo sistemimi i kantiereve, por vetëm brenda fashës orare 08:00–17:00.
Për të mos penalizuar subjektet ndërtuese në raport me detyrimet e tyre ligjore, në vendim sqarohet se periudha e pezullimit do të përllogaritet si afat shtesë mbi afatin fillestar të lejes së ndërtimit, duke kompensuar kështu kohën e ndërprerjes së punimeve.
