Ministri i Bujqësisë dhe Zhvillimit Rural, Andis Salla, dhe Kryetari i Bashkisë Maliq, Gëzim Topçiu, kanë inspektuar nisjen e punimeve për rehabilitimin e argjinaturës së lumit Devoll, një ndërhyrje që synon mbrojtjen e tokave bujqësore nga përmbytjet.
Projekti i ri përfshin ndërtimin e mbrojtjes me gabione dhe gurë kave përgjatë një gjatësie prej 350 metrash linearë në secilën anë të argjinaturës. Për të garantuar qëndrueshmërinë e kësaj vepre infrastrukturore përballë prurjeve të larta të lumit dhe fenomeneve natyrore, do të përdoret një volum prej rreth 5.000 m³ gurë.
Mbrojtja e tokave bujqësore nga erozioni
Ky investim pritet të rrisë ndjeshëm sigurinë e infrastrukturës ujore në zonë, duke mbrojtur sipërfaqet e mbjella dhe duke shmangur rrezikun e vazhdueshëm të erozionit. Ndërhyrja do të krijojë kushte më të sigurta për zhvillimin e aktivitetit bujqësor dhe përmirësimin e jetesës së banorëve të zonës përreth.
Rehabilitimi i argjinaturës së lumit Devoll vjen si pjesë e investimeve të vazhdueshme të Ministrisë së Bujqësisë dhe Zhvillimit Rural, të cilat fokusohen në përmirësimin e sistemit të ujitje-kullimit dhe masave parandaluese për mbrojtjen nga përmbytjet në shkallë vendi.
