Greqia po përballet me një nga situatat më të rënda të sezonit të zjarreve, ku flakët kanë shkatërruar dhjetëra banesa dhe kanë detyruar autoritetet të urdhërojnë evakuime masive në disa rajone të vendit. Sipas autoriteteve greke, rajonet e Atikës dhe Evias mbeten në nivelin maksimal të rrezikut, të klasifikuar në nivelin 5, ndërsa qindra zjarrfikës, dhjetëra automjete, avionë dhe helikopterë po vijojnë betejën me flakët në disa fronte njëkohësisht.
Situata kritike në Porto Germeno dhe Beoti
Zona më e goditur deri më tani është Porto Germeno, ku sipas nënkryetarit të Bashkisë së Mandrës, mbi 100 shtëpi janë djegur ose kanë pësuar dëme të konsiderueshme. Zjarri në këtë zonë është ndarë në tre fronte aktive dhe vazhdon të përhapet me shpejtësi, i favorizuar nga erërat e forta. Në orët e para të mëngjesit, Roja Bregdetare ndërhyri për të evakuuar 12 persona nga plazhi i Porto Germenos.
Për shkak të rrezikut të drejtpërdrejtë ndaj zonave të banuara, autoritetet kanë urdhëruar evakuimin e banorëve në disa vendbanime në Beoti, duke përfshirë Agia Paraskevi, Kryo Pigadi, Agios Nektarios dhe Livadostra. Gjatë natës, sistemi i emergjencës 112 u dërgoi mesazhe urgjente banorëve të Domvrenës për t’u larguar menjëherë drejt Thisvis.
Përhapja e vatrave në rajone të tjera
Flakët po përhapen me shpejtësi edhe në Panorama Aigialeia në Akaia, ku janë urdhëruar evakuimet e menjëhershme në Arravonitsa, Synania, Agioi Theodoroi, Neo Erineo dhe zona të tjera përreth. Një tjetër vatër e madhe dhe e rrezikshme është regjistruar në Skaloma të Fokidës. Për menaxhimin e kësaj vatre janë angazhuar 28 zjarrfikës, shtatë automjete, shtatë avionë dhe dy helikopterë, ndërsa banorët e zonave Klima, Magoula, Pigi dhe Nea Koukoura janë urdhëruar të largohen nga shtëpitë e tyre.
Ndërkohë, në Larisa, një zjarr tjetër ka shpërthyer në zonën Kyra Farsala. Lajmi i vetëm pozitiv vjen nga Achladochori i Serres, ku flakët janë vënë nën kontroll të plotë dhe nuk raportohet më për asnjë front aktiv.
Kushte ekstreme dhe reagimi i qeverisë
Zëdhënësi i Departamentit të Zjarrfikësve, Yiannis Artopoios, deklaroi se kushtet në terren janë jashtëzakonisht të vështira për shkak të erërave të forta. Ai theksoi se në disa raste zjarrfikësit “nuk mund të hapnin as dyert e automjeteve” për shkak të stuhive të erës, duke u bërë thirrje qytetarëve të respektojnë pa asnjë përjashtim urdhrat e sistemit 112.
Ministri përgjegjës për Mbrojtjen Civile, Evangelos Tournas, bëri të ditur se mekanizmi i emergjencës po operon në kufijtë e kapaciteteve të tij. Sipas ministrit, dita nisi me 11 vatra aktive zjarri dhe kushtet ekstreme të motit kanë kufizuar ndjeshëm edhe përdorimin e mjeteve ajrore për shuarjen e flakëve. Përballë kësaj situate të rënduar, kryeministri Kyriakos Mitsotakis ka vizituar Qendrën e Koordinimit të Departamentit të Zjarrfikësve për të ndjekur nga afër zhvillimet dhe operacionet e shpëtimit.
