Ndërsa emocionet e finales së Big Brother Vip Albania janë në kulmin e tyre, aktori Laert Vasili përjetoi një nga momentet më të veçanta në shtëpi. Ai hapi kutinë misterioze që mori më herët dhe brenda saj ndodhej një qeleshe, simbol i traditës shqiptare.
Pak më vonë, atmosfera në shtëpi u ndez kur një grup këngëtarësh dhe valltarësh popullorë me veshje tradicionale u futën për ta marrë Laertin dhe për ta çuar në një tjetër ambient. Aty u zhvillua një festë e vërtetë me këngë, valle dhe emocion, ku pjesëmarrës ishin miqtë dhe familjarët e aktorit, përfshirë edhe të ëmën, tashmë shumë të dashur për publikun, mami Rebekën.
Gjatë spektaklit, moderatori Ledion Liço bëri humor me atmosferën festive duke thënë:
“Duket si dasma më e shtrenjtë në histori,” – e më pas pyeti mamin Rebeka nëse donte t’i sillte edhe Valbonën.
Ajo iu përgjigj mes të qeshurash: “Dasma më e madhe do jetë kur ta martoj Laertin… Sille Valbonën… dhe 100 të tjera!”
Surprizat nuk përfunduan këtu. Në një moment emocionues, Kryetari i Bashkisë së Kolonjës, Erion Isai, hyri në skenë dhe shpalli Laert Vasilin “Qytetar Nderi” të Leskovikut.
“Me motivacionin për merita të larta në art, promovimin e zonës së Leskovikut dhe për të gjithë kontributin e tij për këtë zonë, e shpall Laert Vasilin qytetar nderi. Nga sot, s’ka më ‘s’agapao’, por ka ‘të dua’,” – u shpreh Isai, duke përcjellë një mesazh të bukur dhe patriotik.
Një mbrëmje plot ndjesi, krenari dhe dashuri për traditën, që mbetet në kujtesën e publikut si një nga momentet më të veçanta të këtij edicioni të BBV.
