Kryetari i Grupit Parlamentar të Partisë Socialiste, Taulant Balla, ka njoftuar se do të jetë i pranishëm në marshimin që zhvillohet nesër në Prishtinë, në mbështetje të ish-drejtuesve të Ushtrisë Çlirimtare të Kosovës që po gjykohen në Hagë. Njoftimi është bërë gjatë një takimi që Balla ka zhvilluar me banorët në Kamëz, ku ai bëri me dije se tubimi do të nisë në orën 14:00.
Solidaritet me ish-drejtuesit e UÇK-së
Gjatë fjalës së tij, Balla përmendi në mënyrë të veçantë Hashim Thaçin, Kadri Veselin si dhe dy ish-drejtues të tjerë të UÇK-së që ndodhen përballë procesit gjyqësor. Ai e cilësoi pjesëmarrjen e tij si një shenjë të qartë solidariteti me ish-komandantët e UÇK-së.
Lidhur me këtë organizim, Balla u shpreh: “Nesër, shqiptarët mblidhen në Prishtinë në orën 14:00, në një marshim në mbështetje të komandantëve të UÇK-së”. Tubimi synon të bashkojë qytetarë dhe përfaqësues publikë në mbështetje të ish-krerëve Ushtrisë Çlirimtare të Kosovës.
