Të rinjtë në Korçë ashtu si edhe në shumë qytete të tjera të Shqipërisë i kanë sytë nga emigrimi. Ata shprehen se nuk shohin shpresë për ndryshimin e situatës në vend dhe ndaj largimin e shohin si një mundësi për të ndryshuar “fatin e tyre”.
Për Stefan Simaku, i cili punon me të rinjtë e qarkut të Korçës, thotë se rinia vuan mungesën e mundësive për t’u përfshirë në jetën publike.
“Për të rinjtë këtu në zonën tonë janë shumë të pakta mundësitë që u ofrohen për të qenë aktiv, për të marrë pjesë në aktivitete kulturore, rinore, aktivitete të cilat i tërheqin ata. Ka nevojë për më tepër mundësi e hapësira që të rinjve duhet tu jepen nga institucionet shtetërore”, shprehet ai.
Për Ismeralda Seidollin, e cila ishte pjesë aktive në protestën studentore të 2018, “rinia është në një fazë krizë delikate”.
“Aspekti ekonomik, shëndetësor, edukimi, janë faktor shtysë e me kryesore që ndikojnë për ata që duan të largohen nga Shqipëria. Standardet dhe cilësia e jetesës le për te dëshiruar, aspekti shëndetësor shërbimet në ambientet spitalore le për te dëshiruar, infrastruktura, etj.”, shprehet studentja.
