Fundjava në plazhin më të vjetër të qytetit, te “Uçkat”, solli emocione të veçanta për qytetarët e Pogradecit dhe pushuesit e shumtë që zgjodhën bregun e liqenit për të kaluar ditët e verës. Aktiviteti “Te Uçkat si dikur” riktheu atmosferën e hershme të këtij vendi historik, që dikur ishte skenë e përditshme e fëmijërisë pogradecare dhe ku janë xhiruar filma si “Mëngjese Lufte”.
Fëmijët kapën peshk me vazo, të rinjtë garuan në not, ndërsa pushuesit patën mundësinë të përjetonin stilin tradicional të jetës në breg të liqenit dikur. Rita Topulli, një pogradecare e hershme, ndau me emocion kujtimet e saj nga fëmijëria:
“Që në mëngjes e deri në darkë si rosat rrinim, zinim peshk me vazo… Ky ishte vendi më i bukur që ekzistonte atë kohë. Jam e kënaqur që po ripërsëritet historia dhe shohim fëmijërinë tonë.”
Një pushuese ndau për herë të parë eksperiencën e saj me këtë mënyrë tradicionale peshkimi:
“Asnjëherë nuk kisha kapur kështu, kisha parë mamin tim… ishte argëtuese dhe u bashkova me fëmijët.”
Pjesë e aktivitetit ishin edhe dy emra të njohur të sportit të notit në Pogradec, Liljana Busho dhe Sotiraq Iftica, të cilët folën për rikthimin e sportit të notit në qytet dhe përfshirjen e brezit të ri në këtë traditë të hershme.
“Na riktheu kohën e 58 viteve më parë. Është nostalgji për fëmijët dhe duhet më shumë mbështetje për notin,” tha Busho.
Ndërsa Iftica shtoi:
“Ky vend është pjesë e historisë së qytetit. Sot kemi disa grupe noti dhe organizojmë maratonën për nder të Agron Ruvinës.”
Pjesë e veçantë e ditës ishte edhe ekspozita historike me fotografi të rralla nga pushtimi francez dhe koleksioni i fotografit pogradecar Misto Cici, që sjellin atmosferën e këtij plazhi që prej një shekulli më parë.
Drejtori i Turizmit dhe Trashëgimisë Kulturore në bashki, Ledjan Zeqollari, u shpreh:
“Ekspozita e sjell këtë plazh ashtu siç ka qenë, përmes fotove autentike të kohës, një pasuri e vërtetë për historinë dhe identitetin tonë.”
E pranishme në aktivitet ishte edhe një turiste franceze, e cila po viziton Shqipërinë për herë të parë dhe ndau përshtypjet e saj pozitive për Pogradecin:
“Kam qenë në Shkodër, Ksamil, Korçë, dhe tani në Pogradec. Më pëlqen shumë liqeni, mikpritja, ushqimi. Është një vend që të qetëson.”
Plazhi i “Uçkave”, i rijetësuar vitet e fundit, tashmë ofron jo vetëm argëtim, por edhe një kënd kulturor ku vizitorët mund të shohin fotot e 21 filmave të xhiruar në Pogradec dhe të prekin nga afër trashëgiminë peshkarese me instalacionin e rrjetave tradicionale.
“Te Uçkat si dikur” nuk është thjesht një aktivitet veror – është një udhëtim në kohë që bashkon brezat me historinë dhe identitetin e qytetit buzë liqenit.”
