Pesë, gjashtë, shtatë milionë turistë apo edhe dhjetë janë shifrat që raportohen periodikisht nga institucionet shqiptare për këtë sezon.
Por aq sa shtohet numri i tyre aq del më në pah se nuk jemi gati për këtë fluks turistësh, si në shërbim, infrastrukturë apo çdo gjë tjetër.
Turistë që vdesin në veri në guida turistike, pasi mungojnë shtigjet e markuara, në det turistë të mbytur se mungon siguria në plazhe, sherre me pronarët e palzheve se vemë peshqirët dhe më e tmerrshmja rrugë pa siguri, tabela dhe shoferë që ikin si të çmendur duke shkelur çdo normë të qarkullimit rrugor.
Dje, një e re italiane, 33 vjeçe, vdiq tragjikisht në aksident rrugor pasi u përplas nga makina në aksin rrugor Lin-Pogradec. Ajo kishtë dëgjuar dhe lexuar se duhet ta vizitonte Shqipërinë, “Maldivet e Ballkanit”, por në ato rreshta nuk kishte lexuar se jeta e saj mund të mbaronte me shpejtësinë e dritës, pasi shoferat këtu nuk zbatojnë rregullat e shpejtësisë. Pasi shijoi një drekë buzë liqenit i hipi motorrit për të vijuar vozitjen, pa e ditur se do të ishte e fundit sapo të dilte në rrugë.
Vdiq, e vramë, ja morëm jetën, dhamë një mesazh që ne nuk jemi gati, duam vite të jemi njerëz normalë, pasi ja shkelim gazit pa marrë parasysh se vrasim njerëz. Diku nëpër portalet italiane mund të ketë tituj “Italianja shkoi të vizitonte Shqipërinë por mori vdekjen”! Edhe sa? Deri kur? Kur do të kuptojmë se të jesh vend turistik duhet të civilizohesh në çdo drejtim?
Një muaj më parë në Qafë Thanë një turist gjerman u përplas keqas teksa voziste me motorr, pothuajse u paralizua nga mjeti që e drejtonte një riosh mendjelehtë që i duket rruga si pistë e Formula 1.
Por nëse vjen nga Qafë Thana drejt Korçës ka me dhjetra kryqëzime, dalje e hyrje në rrugë pa sinjalistikë, karroca dhe biçikleta pa asnjë stop ndriçues, janë rrugët njësoj si te filmi Squid Game ku mund të gjesh vdekjen në gabimin më të vogël.
A duam turizëm? Atëherë dreqi e marrtë bëni gjënë minimale, jepni siguri në male, plazhe dhe rrugë. Mos shisni shifra ardhjesh por shikoni shifrat e vdekjeve, asnjë turist apo familje e tyre nuk ua ka borxh që të marrë pas një kuti druri me të afërmin e tyre të vdekur brenda.
O bëjeni, o lëreni fare, nuk mundet që të flasim për turizëm në një kohë që iu servirim vdekjen sapo shkelin këtu!
