Trajneri i Skënderbeut, Ivan Gvozdenovic, u shfaq i lumtur për fitoren që skuadra e tij mori në miqësoren ndaj Flamurtarit me rezultatin 2-1.
Duke folur për mediat, tekniku i korçarëve deklaroi se pret edhe dy afrime nga merkato. I pyetur për zërat që e lidhin me Partizanin, ai tha se është në dorë të presidentëve, por theksoi se mendon që do të vazhdojë në stolin e Skënderbeut.
“Mund të them se ishte testi i fundit për ne para Elbasanit. Por do të thosha se testet kanë qenë të gjitha, edhe kundër Kalitheas, Pogradecit e të tjera. Ishte bukur, sepse fituam, por çdo ndeshje është test. Në këtë ndeshje ishim mirë, të disiplinuar dhe vrapuam. Ishim të shpejtë në tranzicion pozitiv, të qetë përpara portës dhe kjo është diçka shumë e rëndësishme. Tani jemi në rregull, por kampionati është shumë i gjatë dhe kemi nevojë për të gjithë lojtarët.
S’mund të them se ky do të jetë 100% grupi, kemi nevojë edhe për dy lojtarë të tjerë, një sulmues anësor dhe një sulmues qendre. Kjo është situata që mendoj unë. Kemi edhe tri javë kohë deri në fund të merkatos dhe do Zoti sjellim edhe dy lojtarë. Nuk na është hapur një gropë me largimin e Liços, por ai na mungon, sepse është lojtar shumë i mirë, kapiten, korçar. Kemi Jurin, ka më shumë besim tani, është më i qetë dhe deri tani ka bërë mirë.
Partizani? Nuk komentoj asnjëherë, ju e dini. Faleminderit për mirëkuptimin. Çdo gjë e ka në dorë presidenti Takaj dhe presidenti i Partizanit, ata vendosin. Kam kontratë edhe dy vjet, mendoj se do të jem trajner i Skënderbeut.”, deklaroi Gvozdenovic.
