Një ngjarje tragjike është shënuar mëngjesin e sotëm në Pogradec, ku trupi i pajetë i një të moshuari është gjetur në ujërat e liqenit.
Sipas informacioneve nga Drejtoria Vendore e Policisë Korçë, rreth orës 09:45, në lagjen nr. 1, është dalluar në liqen trupi i 87-vjeçarit D.O., i cili dyshohet se është mbytur. Banorët që vunë re trupin njoftuan menjëherë policinë.
Në vendin e ngjarjes mbërritën shërbimet e policisë dhe grupi hetimor, të cilët kryen këqyrjen e trupit, ku nuk u konstatuan shenja dhune. Familjarët e viktimës kanë deklaruar se i moshuari ishte larguar nga banesa në orët e para të mëngjesit, rreth orës 05:00.
Autoritetet po vijojnë hetimet për të zbardhur plotësisht rrethanat e kësaj ngjarjeje.
