Një ide kreative dhe me shumë zemër po vjen nga një grup aktorësh të teatrit “Andon Zako Çajupi” në Korçë, të cilët synojnë të krijojnë kinemanë e parë të dedikuar për fëmijët në qytet. Projekti, i titulluar “Udhëtim drejt shtëpisë”, ka për qëllim të ofrojë më shumë se thjesht argëtim – ai synon të edukojë dhe frymëzojë fëmijët përmes botës magjike të filmave të animuar.
Kjo kinema do të funksionojë sipas një programi të rregullt, ku filmat do të përzgjidhen me kujdes për të përcjellë mesazhe të rëndësishme edukative. Përmes kësaj nisme, aktorët shpresojnë të krijojnë një ambient të ngrohtë dhe tërheqës, ku fëmijët jo vetëm do argëtohen, por do mësojnë vlera dhe parime jetësore.
Silvio Goskova, një nga ideatorët e projektit, shprehet se kjo kinema do të plotësojë një boshllëk në jetën kulturore të fëmijëve korçarë.
“Filmat e animuar janë një formë e fuqishme komunikimi për fëmijët. Përmes tyre, mund të edukojmë, të ndërtojmë empati dhe të krijojmë kujtime të bukura. ‘Udhëtim drejt shtëpisë’ është një hap drejt kësaj ëndrre,” – u shpreh Goskova.
Projekti pritet të ngjallë interes dhe mbështetje nga komuniteti, duke sjellë një dimension të ri kulturor për më të vegjlit e qytetit të Korçës.
