Shoqëria Rajonale “Ujësjellës Kanalizime Korçë” SH.A. ka përsëritur thirrjen drejtuar qytetarëve për të kursyer ujin, sidomos gjatë stinës së verës, kur nevojat rriten dhe burimet ujore janë gjithnjë e më të kufizuara.
Në një apel publik, UKRK SH.A. thekson se burimet ujore nuk janë të pakufizuara dhe po pakësohen çdo vit si pasojë e ndryshimeve klimatike. Përveç kësaj, temperaturat e larta verore shtojnë ndjeshëm kërkesën për ujë, ndërkohë që kapacitetet e prodhimit dhe shpërndarjes mbeten të kufizuara.
“Çdo pikë e humbur apo e shpërdoruar sot, mund të mungojë nesër për dikë tjetër. Vetëm përmes një përdorimi të arsyeshëm dhe solidar mund të garantojmë furnizim të qëndrueshëm për të gjithë,” thekson UKRK SH.A.
Shoqëria rajonale bën thirrje për përdorim të kujdesshëm dhe të përgjegjshëm të ujit, duke theksuar se mbrojtja e tij është një përgjegjësi e përbashkët: “Bashkë, me kujdes dhe ndërgjegjësim, mund ta mbrojmë një nga pasuritë më jetike: ujin.”
