Skënderbeu në volejboll për femra rrezikon edhe titullin kampion, trajneri Koja apelon: Të çojmë skuadrën në finale.
Ekipi i Skënderbeut në volejboll për femra që ekspozohet si krenaria sportive e qytetit, këtë sezon ka përgjegjësinë që të fitojë titullin kampion kombëtar. Ky trofe jo thjesht për hir të investimit, por sepse ka mbetur i vetmi, nga ata që në gjuhën sportive njihen se “shpëtojnë sezonin”. Skënderbeu në volejboll për femra, me pritshmëri për disa trofe këtë sezon, tashmë i ka shpresat vetëm te fitimi i kupës si kampion kombëtar.
I realizueshëm ose jo ky objektiv, duket se ka vënë në dilemë edhe trajnerin e ekipit të volejbollit të femrave Orlando Koja, i cili apelon për më shumë mbështetje, w cila në fakt deri tani duket se nuk i ka munguar.
“Eshte momenti te mblidhemi gjithe bashke per ta cuar Skuadren tone ne finale” ka përcjellë mesazhin në profilin e tij në rrjetet sociale Orlando Koja.
Ky reagim i trajnerit të Skënderbeut vjen pas humbjes një ditë më parë në ndeshjen e kthimit play-off që ekipi me ngjyrat bardhekuq pësoi në Pogradec. Skënderbeu e kishte fituar ndeshjen e parë në shtëpi me rezultatin 3-1 në sete dhe humbi atë të kthimit në Pogradec me rezultatin 3-2.
Pavarësisht se ekipi i vajzave të drejtuara nga Koja ka avantazhin e ndeshjes shtesë që për nga renditja e siguruar prej Skënderbeut do të luhet në Korçë, për apelin e mbështetjes që lëshon trajneri duket sikur bien këmbanat jo për mirë në volejbollit korçar të femrave këtë sezon.
