Mbrëmjen e djeshme, Muzeu Kombëtar i Artit Mesjetar në Korçë u mbush me tingujt magjepsës të muzikës baroke dhe antike mesdhetare, gjatë koncertit “Ex Silentio”, pjesë e edicionit të XII-të të Festivalit Ndërkombëtar të Muzikës Baroke “Vox Baroque”.
Artistët grekë Dhimítris Koundouras (flaut), Iríni Bilini-Moraiti (vokal dhe vielë) dhe Thýmios Atzakas (liutë orientale) sollën një interpretim të rafinuar, duke ndërthurur mjeshtërinë muzikore me atmosferën unike që ofron ambienti i muzeut, ku ruhen thesare të çmuara të ikonografisë shqiptare.
Publiku i pranishëm përjetoi një mbrëmje të mbushur me emocione dhe elegancë, ku muzika kapërceu kohën dhe u shndërrua në një udhëtim artistik përmes historisë dhe kulturës mesdhetare. Ky koncert konfirmon edhe një herë rolin e Korçës si epiqendër e trashëgimisë kulturore dhe jetës artistike në vend.
Festivali “Vox Baroque” vijon të jetë një ndër aktivitetet më të rëndësishme të verës kulturore në qytetin e Korçës, duke sjellë pranë publikut shqiptar artistë të shquar ndërkombëtarë dhe interpretime të nivelit të lartë.
