Situata e zjarreve në qarkun e Korçës paraqitet më e qëndrueshme në njërën nga vatrat, ndërsa në tjetrën vijon puna për neutralizim.
Sipas raportimit zyrtar të Prefekturës, vatra e zjarrit pranë fshatit Vernik, në territorin e Bashkisë Devoll, është drejt normalizimit. Që prej orës 05:00 të mëngjesit, në terren ndodhen 75 forca nga zjarrfikësja, shërbimi pyjor dhe shërbimet publike. Autoritetet shprehen optimiste për neutralizimin e plotë të flakëve, nëse nuk do të ketë riaktivizime për shkak të erës apo temperaturave të larta të ditës.
Ndërkohë, më e vështirë paraqitet situata në zonën e Dishnicës, ku po punojnë 55 efektivë nga strukturat e MZSH-së dhe shërbimi pyjor. Terreni i thyer dhe i thepisur, distanca e madhe dhe dendësia e bimësisë, e favorizuar edhe nga era dhe humusi, po e vështirësojnë ndërhyrjen. Megjithatë, puna për izolimin e vatrave vijon pa ndërprerje.
Autoritetet lokale mbeten në gatishmëri për të përballuar çdo riaktivizim të mundshëm, ndërsa u bëhet thirrje qytetarëve të shmangin çdo veprim që mund të rrezikojë përhapjen e flakëve.
