Prefektura e Qarkut Korçë ka dhënë informacionin më të fundit mbi situatën e zjarreve në territor, ku falë ndërhyrjes së koordinuar të strukturave vendore dhe mbështetjes së forcave ushtarake, disa vatra janë neutralizuar ose mbajtur nën kontroll.
Në fshatin Vernik, njësi administrative Qendër Bilisht, Bashkia Devoll, zjarri është neutralizuar. Terreni vijon të monitorohet nga shërbimi zjarrfikës i bashkisë me një mjet zjarrfikës dhe tre efektivë të MZSH.
Ndërkohë, në zonën e Dishnicës, zjarri paraqitet me intensitet të ulët dhe nuk ka pasur përhapje të re. Puna për neutralizimin e tij vijon, pavarësisht erës që e vështirëson ndërhyrjen. Prej orës 05:00 të mëngjesit janë angazhuar në terren: dy mjete ushtarake dhe 31 forca ushtarake; një mjet zjarrfikës dhe pesë efektivë të MZSH; tre mjete të Njësisë Administrative Bulgarec me 35 forca; si dhe dy mjete pyjore me dhjetë punonjës të shërbimit pyjor.
Zjarri është drejtuar drejt jugut të kishës së Shën Marenës, në drejtim të fshatit Barç, përgjatë grykës. Në këtë zonë po punojnë njëkohësisht ushtarët, forcat pyjore dhe ato të Nj.A. Bulgarec për të mbajtur situatën nën kontroll. Sipas drejtuesve të operacionit, situata është aktualisht e qetë dhe optimizmi për neutralizimin përfundimtar të vatrës gjatë ditës është i lartë, në varësi të kushteve të erës që pritet të intensifikohet pas orës 11:00.
Një tjetër rast u raportua gjatë natës në fshatin Goricë, Bashkia Pustec, ku zjarri ra në vendgrumbullimin e mbetjeve urbane. Falë njoftimit të shpejtë nga stacioni i Goricës dhe reagimit në kohë të shërbimit zjarrfikës të bashkisë Pustec, zjarri u izolua dhe neutralizua pa shkaktuar rrezik të mëtejshëm. Zona po vijon të monitorohet për të shmangur riaktivizimin.
Autoritetet lokale theksojnë se angazhimi në terren do të vijojë deri në shuarjen e plotë të vatrave dhe garantimin e sigurisë në të gjitha zonat e prekura.
