Vijon prej mbrëmjes së djeshme vatra e zjarrit e shfaqur pranë piramidës kufitare nr. 12, në kufirin me Greqinë, në territorin e Bashkisë Kolonjë. Në terren janë angazhuar 40 forca nga shërbimet e MZSH-së, Bashkisë Kolonjë, Policisë dhe Agjencisë së Zonave të Mbrojtura, të cilat po punojnë për të izoluar përhapjen e flakëve.
Ndërhyrja paraqitet e vështirë për shkak të terrenit të thyer dhe faktit që zona kufitare ka prezencë minash, çka shton rrezikun për efektivët. Deri më tani, zjarri nuk ka depërtuar në Parkun Natyror të Gërmenjës.
Nga ana e Pefekturës bëhet me dije se janë kryer komunikimet e nevojshme me Agjencinë Kombëtare të Mbrojtjes Civile dhe me autoritetet greke, me qëllim mobilizimin e strukturave përgjegjëse nga të dyja anët e kufirit. Të dy palët mbeten në gatishmëri të plotë dhe në kontakt të vazhdueshëm për koordinimin e veprimeve në terren për të mos lejuar flakët të depërtojne brenda parkut.
