Ndonëse festa e 1 Majit është një ditë proteste, në vendin tonë, ajo është ditë festive.
Festa e Puntorëve festohet në gjithë vendin, qytetarët mblidhen në grupe dhe dalin e shijojnë ardhjen e pranverës. Bëjnë piknik dhe kalojnë momente të bukura me njëri-tjetrin.
Dikur Pylli i Fazanëve gumëzhinte nga njerëzit e shumtë në këtë datë festive. Për vite me radhë ai u la në harresë deri sa kaloi si pronë e bashkisë dhe po rimerr vëmendjen e duhur nga pushteti vendor. Ai është kthyer në identitetin e vet dhe po mirëmenaxhohet nga bashkia e Maliqit.
Sot, pjesa më e madhe e banorëve të Maliqit shkojnë në Pyllin e Fazanëve si dikur.
Një pyll që tashmë është bërë atraksion turistik jo vetëm për vendasit por edhe për turistët. Natyra e paqtë, koha e bukur, flladi i lehtë dhe qetësia që të fal ky pyll, të bën të shkëputesh nga përditshmëria dhe të kalosh momente të bukura me familjarët.
Për të gjithë ju që doni të sodisni natyrën, të argëtoheni në ajrin e pastër, të pedaloni në shtigjet e biçikletave, të shihni nga afër sorkadhet dhe fazanët, mund t’i realizoni vetëm në Pyllin e Fazanëve!
